გაკვეთილი 3: სამართლიანია?

უმცირესობები და უმრავლესობა  სკოლის სათამაშო მოედანზე (კვლევის შედეგების განხილვა)

გაკვეთილის აღწერა

მოსწავლეები ნაწილდებიან იმავე ჯგუფებად, რომლებშიც წინა გაკვეთილზე იმუშავეს და თან აქვთ, ასევე, წინა გაკვეთილზე გაკეთებული ჩანაწერები.

განიხილავენ, თუ როგორ სურთ მათ, გააცნონ კლასს კვლევის შედეგები. მასწავლებელი თითოეულ ჯგუფს აძლევს  დიდი ფორმატის თითო ფურცელს (მოსწავლეები ამ ფურცელს პოსტერის დასამზადებლად იყენებენ).

ამის შემდეგ, ჯგუფები იწყებენ შედეგების პრეზენტაციაზე მუშაობას. პოსტერზე შედეგები დატანილ უნდა იქნას სამ ნაწილად, ესენია:

• რაოდენობრივი შედეგები (სტატისტიკური მიმოხილვა);
• ხარისხობრივი შედეგები (ინტერვიუებისა და გამოკითხვის შედეგები);
• შედეგების ინტერპრეტაცია და შესაძლო გასატარებელი ღონისძიებები.

პოსტერზე შედეგების დატანის ნიმუში:

მოსწავლეთა ჯგუფების პოსტერების დამზადებაზე მუშაობის პერიოდში, მასწავლებელი უნდა გადაადგილდებოდეს საკლასო ოთახში და მოსწავლეებს, კითხვების ჩამოყალიბებასა და/ან შედეგების დატანაში დახმარების მიზნით, აძლევდეს მითითებებსა და მინიშნებებს.

მას შემდეგ, რაც ყველა ჯგუფი დაასრულებს სამუშაოს, თითოეულ ჯგუფს ეძლევა 5 წუთი, კლასისათვის საკუთარი პოსტერის გასაცნობად. ამის შემდეგ ყველა პოსტერი უნდა გამოიფინოს სკოლაში, უმჯობესია ისეთ ადგილას, სადაც სხვა კლასის მოსწავლეებსაც ექნებათ საშუალება, გაეცნონ მათ.

ალტერნატიული ვარიანტი:

მოსწავლეთა ინტერპრეტაციებისა და მათ მიერ რეკომენდებული ღონისძიებების შესახებ იმართება შემდგომი დისკუსია, სადაც ასევე განიხილება ჩატარებული კვლევის შედეგები და ის შესაძლო შედეგები, რაც ამ კვლევას შეიძლება მოჰყვეს, როგორც კონკრეტული კლასის მოსწავლეებისათვის, ასევე, მთლიანი სკოლისათვის. ამ თემაზე პრეზენტაციის გაკეთებას, მოსწავლეთა საბჭოს წინაშე ან მასწავლებელთა კონფერენციაზე, შესაძლოა მოჰყვეს სკოლაში, უმრავლესობისა და უმცირესობის თვალსაზრისით არსებული სიტუაციის გარკვეული ცვლილებები.