Merrni në konsideratë palët e interesit

Nëse keni ndërmend të praktikoni demokracinë pjesëmarrëse, është e nevojshme të parashikoni përfshirjen e grupeve të mundshme të njerëzve dhe rolet e tyre specifike. Për më tepër, nëse në vendin tuaj ekzistojnë ligje që u japin palëve të interesit të drejta specifike në vendimmarrje në shkollë, ose institucionet si këshilli i nxënësve ose një këshill i përbashkët shkollor (me mësues, prindër dhe nxënës) janë të përcaktuara me ligj, ju duhet t’i merrni parasysh këto dhe ta bëni shfrytëzimin më të mirë të mundshëm prej tyre.

Nxënësit…

… përbëjnë grupin kryesor të synuar, puna e të cilëve është të mësojnë dhe të veprojnë në mënyrë demokratike në shkollë. Ata mund të përfshihen në procesin e mësimdhënies dhe të nxënit gjatë orëve të mësimit, në çështjet që kanë të bëjnë me të gjithë klasën (rregulla, udhëtimet e klasës, jetën shoqërore, etj …), si edhe në çështjet e tërë shkollës, si infrastruktura, ngjarjet shkollore ose rregullat e shkollës. Për më tepër, nxënësit janë burim i vlefshëm për të gjitha përpjekjet për të reformuar dhe përmirësuar procesin mësimor në klasë, ose shkollën si tërësi. Për më tepër, atyre mund t’u mësohet demokracia në mësime të ndryshme bazuar në materialet mësimore nga kjo ueb faqe, Demokracia në veprim.

Prindërit…

… janë përgjegjës për fëmijët e tyre. Si të tillë, ata kanë një rol të madh në edukimin e fëmijëve të tyre. Nuk ka arsimim të suksesshëm në shkollë pa mbështetje dhe bashkëpunim prindëror. Kjo është arsyeja pse përfshirja e prindërve është thelbësore. Prindërit mund të përfshihen në mënyra të ndryshme. Epstein sugjeron forma të përfshirjes së prindërve, të tilla si të treguarit prindërve se çfarë mund të bëjnë në shtëpi për të mbështetur përparimin e nxënësve të tyre në shkollë, ose informimin e rregullt të prindërve për fëmijët e tyre dhe programin shkollor. Prindërit gjithashtu mund të jenë vullnetarë në shkollë, p.sh. në ngjarjet shkollore ose ofrimin e ndihmës tjetër. Më në fund, prindërit mund të marrin pjesë në proceset e vendimmarrjes në shkollë.

Mësuesit…

… janë edukatorët kryesorë për nxënësit në shkollë. Mësimdhënia e tyre ndikon fuqimisht në atë se si dhe çfarë (mund të) mësojnë nxënësit. Mësuesit i dinë shumë mirë pikat e forta, problemet dhe karakteristikat personale të nxënësve të tyre. Ata janë partnerët më të rëndësishëm për drejtorët. Një bashkëpunim i shëndoshë dhe i ngushtë midis drejtorit dhe mësuesve është thelbësor për sigurimin e kushteve të mira të mësimdhënies dhe të nxënit. Takimet e rregullta midis drejtorëve dhe mësuesve (takimet e stafit) janë standarde në shumicën e shkollave. Në këto takime, ju mund të diskutoni në mënyrë të hapur rregulloret e reja nga autoritetet publike dhe të identifikoni implikimet e tyre për shkollën tuaj, të kuptoni qëndrimet dhe përvojat e mësuesve, të nxisni nisma, delegoni përgjegjësi, si dhe të përfshini stafin tuaj mësimdhënës në pothuajse çdo vendim që do të merret në shkollë.

Komuniteti…

… është konteksti social në të cilin shkolla juaj është e ngulitur. Ai përbëhet nga qytetarët e zakonshëm, shoqata publike dhe private, ndërmarrje dhe kompani, institucione të tjera arsimore publike, institucione publike të shëndetit dhe të sigurisë (spitale, polici etj), si dhe politikëbërës. Bashkëpunimi i ngushtë me këta aktorë u mundëson shkollave të ofrojnë shërbime të zgjeruara që u shërbejnë nevojave të nxënësve dhe prindërve. Duke përfshirë palët e komunitetit në vendimmarrjen shkollore, bëhet gjithashtu e mundur që programet e shkollës të përshtaten me nevojat e komunitetit. Për shembull, nëse policia raporton për një vandalizëm të rritur, ose mjekët janë të shqetësuar për rritjen e varësisë në komunitet ndaj videolojërave, shkollat mund të integrojnë diskutimin e çështjeve të tilla në programin ose kurrikulën e tyre.

Autoritetet publike…

… mbikëqyrin zbatimin e ligjeve dhe rregulloreve që janë të detyrueshme për shkollat. Ato monitorojnë shkollat përmes inspektimeve, vlerësimit dhe vëzhgimit të performancës së shkollës. Në përgjithësi, është e nevojshme të sigurohet që të gjitha vendimet e marra nga një shkollë janë në pajtim me ligjet dhe rregulloret aktuale. Mbani përfaqësuesit e autoriteteve publike të informuar në lidhje me planet tuaja dhe, nëse është e mundur, përpiquni t’i përfshini ata në procesin e vendimmarrjes tuaj në një fazë të hershme. Ndërtimi i besimit do t’i bëjë ata më të disponuar të mbështesin idetë, vizionet dhe projektet tuaja.